Sunday, May 27, 2012

ပုံပြင်ထဲက ပုလွေဆရာနဲ့ ကြွက်တွေကို နှိမ်နှင်းခဲ့ရတဲ့ မြို့မှာ ကြွက်တွေ ပြန်သောင်းကျန်းနေ

ကျနော်တို့ ငယ်ငယ်တုန်းက စာထဲမှာ ဒီပုံပြင်လေးကို သင်ဖူး ကြားဖူး ကြမှာပါ။

၁၂၈၄ခုနှစ်က ဂျာမနီနိုင်ငံ 'လိုဝါး စပ်ဇွန်နီ' ပြည်နယ် 'ဟာမီလင်' မြို့လေးမှာ ကြွက်တွေ သောင်းကျန်းတဲ့ ဒဏ်ခံနေရပါတယ်။ အဲဒီမှာ အရောင်စုံပါတဲ့ အင်္ကျီ ၀တ်ထားတဲ့ ပုလွေဆရာ တစ်ယောက်ဟာ သူ့အတတ်ပညာနဲ့ ကြွက်တွေအားလုံးကို ရှင်းပေးမယ်ဆိုပြီ မြို့သူမြို့သားတွေကို ပြောပါတယ်။ ဒါပေမယ့် သူ့ကိုတော့ ထိုက်တန်တဲ့ အဖိုးအခတော့ ပေးရမယ်ဆိုပြီ တောင်းဆိုပါတယ်။ မြို့သူမြို့သားတွေက သူသာ ကြွက်တွေအားလုံးကို ရှင်းပေးနိုင်ရင် သူရဲ့ တောင်းဆိုချက်အတိုင်း ပေးမယ်လို့ ကတိပြုလိုက်ပါတယ်။ အဲဒီနောက် သူဟာ ပလွေကို မှုတ်ကာ ကြွက်တွေကို ဆွဲဆောင်ပြီ သူ့နောက်ကို လိုက်စေခဲ့ပါတယ်။ နောက်ဆုံး သူဟာ ကြွက်တွေကို '၀က်ဆာ'  မြစ်ကမ်းပါး ဆီကို ခေါ်ဆောင်သွားကာ ကြွက်တွေ အားလုံး မြစ်ထဲကျကာ ရေနစ်သေဆုံးစေခြင်းဖြင့် ကိစ္စတုံးစေလိုက်ပါတယ်။

 Photo via Wiki

အဲဒီမှာ သူက ကြွက်အားလုံးကို နှိမ်နှင်းလိုက်နိုင်လို့ မြို့သူမြို့သားဆီက ထိုက်တန်တဲ့ အဖိုးအခကို တောင်းတဲ့အခါ သူ့ကို အပြည့်မပေးဘဲ တ၀က်တပျက်သာ ပေးကြပါတယ်။ အဲမှာ သူက စိတ်ဆိုးပြီး မြို့ထဲက ထွက်ကာ နောက်တကြိမ်ပြန်လာရင် အားလုံးကို လက်စားချေမယ်လို့ ပြောသွားခဲ့ပါတယ်။

မကြာမီ စိန့်ဂျွန်နဲ့ ပေါလ် ဂုဏ်ပြုတဲ့နေ့တစ်ခုမှာ မြို့သူမြို့သားအားလုံး ဘုရားကျောင်းရောက်နေချိန် သူဟာ မြို့ထဲကို ပြန်လာပြီး ပလွေကို စတင်မှုတ်ပါတယ်။ ဒီတစ်ခါမှာတော့ သူ့ပုလွေသံကို ကြားတာနဲ့ မြို့ထဲက ကလေးတွေ အားလုံး အိမ်ပြင်ထွက်လာပြီးတော့ သူ့နောက်ကို လိုက်သွားကြပါတယ်။ သူဟာ ပုလွေသံနဲ့ ကလေးတွေကို ဆွဲဆောင် ခေါ်သွားပြီး ဂူတစ်ခုထဲကို ကလေးတွေနဲ့အတူ ၀င်ရောက်ကာ ပျောက်ကွယ်သွားပါတော့တယ်။ ဒါပေမယ့် ဒီကလေးတွေထဲမှာ ကလေး သုံးယောက်ဟာ ကျန်နေခဲ့တော့ မိဘတွေ လူကြီးတွေအားလုံး အပြင်ကို ထွက်လာတဲ့အခါ သူတို့က အဖြစ်အပျက်တွေကို လူကြီးတွေကို ပြန်ပြောပြခဲ့ကြပါတယ်။ ကျန်နေခဲ့တဲ့ ကလေးသုံးယောက်ဟာ တစ်ယောက်က ခြေတပေါင်ကျိုး၊ တစ်ယောက်က နားကန်း၊ တစ်ယောက်က မျက်စိကန်း နေသောကြောင့် ကျန်နေခဲ့ခြင်း ဖြစ်ပါတယ်(ကံကောင်းချင်တော့)။ အဲဒီနောက် ကလေးတွေနဲ့ ပုလွေဆရာကို မြို့သူမြို့သားတွေ ဘယ်တော့မှ ပြန်မတွေ့ကြရတော့ဘဲ ပလွေဆရာရဲ့ ကလဲ့စားချေချင်းကို လှလှပပ ခံခဲ့ကြရပါတယ်။

 Photo via Wiki

ပုံပြင်လေးကတော့ ဒါပါပဲကွယ်... အခုက အဲဒီ ပုံပြင်ထဲက မြို့လေးဟာ နောက်တစ်ခါ ပလွေဆရာကို ထပ်ပြီး ခေါ်ရမလို ဖြစ်နေပြန်တယ်လို့ အေပီသတင်းဌါနက သတင်းမှာ ရေးသားထားပါတယ်... အကြောင်းကတော့ မြို့ထဲမှာ ကြွက်တွေ ပြန်သောင်းကျန်းနေပြီး မြို့လေးရဲ့ လှပကျော်ကြားတဲ့ ရေပန်း တစ်ခုကို မီးမပေးနိုင်လို့ ရပ်နားထားခဲ့ရပါတယ်... ကြွက်တွေဟာ မီးကြိုးတွေကို ကိုက်ဖြတ်ထားတာကြောင့်ပါ။

တာဝန်ရှိသူတွေကတော့ ဒီရေပန်းကို ပြန်ပြင်ဖို့နဲ့ ကြွက်တွေကို နှိမ်နှင်းဖို့ လွန်ခဲ့တဲ့ နှစ်ပေါင်း ၇၀၀က အသုံးပြုခဲ့တဲ့ ပုလွေဆရာ နည်းလမ်းကို အသုံးပြုဖို့ မလိုပါဘူးတဲ့ ဘာလို့လဲ မေးတော့ ပုလွေဆရာကို ပေးစရာ ပိုက်ဆံ မရှိလို့ မဟုတ်ဘဲ ဒီရေပန်းကြီးဟာ ပြုပြင်ထိန်းသိမ်းခ ကြီးလွန်းတာကြောင့် မကြာခင်မှာ ပိတ်ဖို့ စီစဉ်ထားပြီးသား မို့လို့ပါတဲ့။ ကြွက်တွေကိုတောင် ကျေးဇူးတင်ရမလိုပါဘဲ။

နောက်ပြီး ထပ်ပြောတာက အရင်တုန်းက ပုလွေဆရာက ကြွက်တွေကို ရေနှစ်သတ်ခဲ့တာဟာ သိပ်ယုတ္တိမရှိကြောင်း အမှန်တော့ ဒီကြွက်တွေဟာ တကယ် ရေကူးကောင်းတဲ့ ကောင်တွေ ဖြစ်ကြောင်း ဆိုပါတယ်။

လူတွေ ပြောလေ့ရှိတဲ့ ဒီပုံပြင်လေးရဲ့ မူကွဲတစ်ခုမှာတော့ နောက်ဆုံးမှာ 'ဟာမီလင်' မြို့သူမြို့သားတွေဟာ နောင်တရပြီး ပုလွေဆရာကို ပြန်လည်တောင်းပန်ကာ ထိုက်တန်တဲ့ အဖိုးအခအပြင် နောက်ထပ် စိန်ရွှေငွေပေါင်း များစွာ ထပ်ချီးမြှင့်ခဲ့တာကြောင့် ပုလွေဆရာက ကလေးတွေ အားလုံး ပြန်လွှတ်ပေးလိုက်ကာ HAPPY ENDING ဖြစ်သွားခဲ့ပါတဲ့ တဲ့လေ.................

News Source
http://hosted.ap.org/dynamic/stories/E/EU_ODD_GERMANY_PIED_PIPER?SITE=AP&SECTION=HOME&TEMPLATE=DEFAULT

Ref;
http://en.wikipedia.org/wiki/Pied_Piper_of_Hamelin