ဟောလီးဝုဒ် ရိုက်ကွင်းပေါ်မှ ကြေကွဲဖွယ်ရာ ဖြစ်ရပ်များ - ၅

The Explendables Movie Poster

Expendables 2


ဇတ်ကားဟောင်းတွေထဲက အကြောင်းတွေ မဖော်ပြခင် ဒီတစ်ခါတော့ မထွက်သေးဘဲ ရိုက်ကူးလျက်ရှိသေးတဲ့ ဇတ်ကားထဲ ကြေကွဲဖွယ်ရာ အကြောင်းလေး ဖော်ပြချင်ပါတယ်။
Expendables 2 ဆိုတာ ၂၀၁၀ ခုနှစ်တုန်းက ထွက်ရှိခဲ့တဲ့ The Expendables ဇတ်ကားရဲ့ နောက်ဆက်တွဲ ဇတ်ကားပါ။ ပိုစတာမှာ မြင်ရတဲ့အတိုင်း ဒီဇတ်ကားဟာ တကယ့် အက်ရှင်မင်းသားကြီးတွေ ဖြစ်တဲ့ ရမ်ဘိုလို့ ပရိသတ်တွေ သိထားကြတဲ့ စတားလုံး၊ ဂျက်လီ၊ Die Hard မင်းသား ဘရုစ်ဝီလီတို့ ပါဝင်သရုပ်ဆောင်ထားတဲ့ ကြေစား စစ်သားအဖွဲ့အကြောင်း ရိုက်ကူးထားတဲ့ အက်ရှင်ဇတ်ကားဖြစ်ပါတယ်။ ဒီဇတ်ကားကို မင်းသား စတားလုံးကိုယ်တိုင် ဒါရိုက်တာလုပ် ရိုက်ကူးခဲ့တာပါ။

အခုလက်ရှိ ရိုက်ကူးဆဲဖြစ်တဲ့ နောက်ဆက်တွဲ Expendables 2 ဇတ်ကားကိုတော့ ဒါရိုက်တာ ဆိုင်မွန်ဝက်စ်(Simon Wes)က ရိုက်ကူးနေပြီး ဒီဒုတိယဇတ်ကားမှာ နောက်ထပ် အက်ရှင်မင်းသား ဗန်ဒိန်းလည်း ပါဝင်အားဖြည့်ထားပါတယ်။ ပထမဇတ်ကားက ကြည့်ရသလောက် နာမည်ကြီးအက်ရှင်မင်းသားတွေ လှိုင်လှိုင်ပါပေမယ့်လည်း ဇတ်အိမ်က သိပ်မကောင်းဘူး ခံစားရပါတယ်။ ဒါပေမယ့် ၀င်ငွေကောင်းတဲ့ကား တစ်ကားတော့ ဖြစ်ခဲ့ပါတယ်။ ဒါကြောင့် ဒုတိယ ဇတ်ကားကို ဆက်လက်ရိုက်ကူးဖို့ လုပ်နေကြတာ ထင်ပါတယ်။

ဒီဇတ်ကားရိုက်ကူးနေစဉ် ဖြစ်ပျက်ခဲ့တဲ့ မတော်တဆမှုကတော့ လွန်ခဲ့တဲ့ အောက်တိုဘာလထဲ ဘူးဂေးရီးယားနိုင်ငံမှာ ဖြစ်ပွားခဲ့တာပါ။ ဆည်တစ်ခုအတွင်းမှာ ရိုက်ကူးနေစဉ် အသုံးပြုတဲ့ ရော်ဘာလှေဟာ ပေါက်ကွဲမှု ဖြစ်ပွားခဲ့ပြီး မင်းသားတွေရဲ့ အစားထိုး စတန့်သမားနှစ်ဦး ထိခိုက်မှုရှိခဲ့ပါတယ်။ အဲဒီအထဲမှာ တစ်ဦးကတော့ နေရာမှာတင်သေဆုံးကာ နောက်တစ်ဦးက အပြင်းအထန် ဒဏ်ရာရသွားခဲ့ပါတယ်။ ဒဏ်ရာရသွားတဲ့ စတန့်သမားကိုတော့ ဆေးရုံချက်ချင်းတင်ခဲ့ပြီး နောက်ပိုင်း ပြန်လည်သက်သာသွားကာ အသက်ဘေးနဲ့ လွတ်ခဲ့တယ်လို့ ဆိုပါတယ်။


 ဒီမတော်တဆဖြစ်နေတဲ့အချိန်မှာ အဓိကမင်းသားတွေဟာ အဲဒီရိုက်ကွင်းမှာ ရှိမနေဘဲ အဲဒီနေရာကနေ နှစ်နာရီလောက် ကားမောင်းရတဲ့ တခြားရိုက်ကွင်းတစ်ခုမှာ ရှိနေခဲ့တာပါ။ ရုပ်ရှင်ရိုက်ကူးနေချိန် ဖြစ်တဲ့အတွက် သေဆုံး၊ ဒဏ်ရာရတဲ့ စတန့်သမားနှစ်ယောက် မည်သူမည်ဝါဆိုတာ အတိအကျ ဖော်ပြခြင်း မရှိသေးဘဲ ဒီမတော်တဆတစ်မှုကိုတော့ ရိုက်ကူးရေး အဖွဲ့  အောက်ပါအတိုင်း တရားဝင် စာထုတ်ပြီးတော့ ၀န်ခံထားပါတယ်။ ပြီးတော့ ဒီအဖြစ်အပျက်ကို သေချာစုံစမ်းစစ်ဆေးဦးမယ်လို့လည်း ဆိုပါတယ်။

"It is with great regret that we confirm this unfortunate accident. Our hearts go out to the families and those on the production affected by this tragedy. The filmmakers are working closely with the authorities in responding to and investigating this accident."

ရုပ်ရှင်ထွက်လာချိန်မှာတော့ ဒီအဖြစ်အပျက်နဲ့ ပက်သက်ပြီး ပိုပြီးတော့သတင်းထုတ်ပြန်မယ်လို့ မျှော်လင့်ရပါတယ်။ စတန့်တွေကို ကိုယ်တိုင်လုပ်ပြီး သရုပ်ဆောင်တတ်တဲ့ အက်ရှင်မင်းသားများကိုယ်တိုင် ရိုက်ကူးနေတာ ဖြစ်နေပေမယ့်လည်း တကယ် အန္တရယ်များတဲ့ စတန့်ကိုတော့ မင်းသားတွေကိုယ်တိုင် သရုပ်ဆောင်ပြီး မရိုက်ကူးတာ ဒီဇတ်ကားမှာ ထူးခြားစွာတွေ့ရပါတယ်။

Expendables 2 ဇတ်ကားကို ၂၀၁၂ သြဂုတ်မှာ ရုံတင်မယ်လို့ ကြော်ငြာထားပြီး အခုလိုလူသေဆုံး ဒဏ်ရာရတဲ့အထိ ရိုက်ကူးနေတဲ့ ဟောလီးဝုဒ်က ဒီ Blockbuster ရုပ်ရှင်ကို ကြည့်ဖြစ်ဖို့တော့ မသေချာပေမယ့် ဒီရုပ်ရှင်ရဲ့ ကြေကွဲဖွယ်ရာ ရိုက်ကွင်းလေးအကြောင်းကိုတော့ ဟောလီးဝုဒ်ရဲ့ ကြေကွဲဖွယ်ရာ ဖြစ်ရပ်များထဲက တစ်ခုအဖြစ် တင်ပြလိုက်ရပါတယ် ခင်ဗျာ။

ဟောလီးဝုဒ် ရိုက်ကွင်းပေါ်မှ ကြေကွဲဖွယ်ရာ ဖြစ်ရပ်များ
ဟောလီးဝုဒ် ရိုက်ကွင်းပေါ်မှ ကြေကွဲဖွယ်ရာ ဖြစ်ရပ်များ - ၂
ဟောလီးဝုဒ် ရိုက်ကွင်းပေါ်မှ ကြေကွဲဖွယ်ရာ ဖြစ်ရပ်များ - ၃
ဟောလီးဝုဒ် ရိုက်ကွင်းပေါ်မှ ကြေကွဲဖွယ်ရာ ဖြစ်ရပ်များ - ၄

Ref:
http://www.tmz.com/2011/10/28/expendables-2-stuntman-killed/#.TuC7r_Ieokg
http://www.mtv.com/news/articles/1673345/expendables-2-stuntman-killed.jhtml
http://en.wikipedia.org/wiki/Expendables_2
http://en.wikipedia.org/wiki/The_Expendables_%282010_film%29